«Мұқағали – мәңгілік жыр» Мұқағали Мақатаевтың 95 жылдық мерейтойына орай педагогтермен әдеби кеш.

«Мұқағали – мәңгілік жыр» Мұқағали Мақатаевтың 95 жылдық мерейтойына орай педагогтермен әдеби кеш.

Мақсаты: Мұқағали Мақатаевтың өмірі мен шығармашылығын наси-хаттау. Педагогтердің шығармашылық қабілеттерін дамыту.  Поэзияға деген сүйіспеншілікті арттыру. Ұлттық рухани құндылықтарды дәріптеуге тәрбиелеу.

Жүргізуші: Армысыздар, құрметті әріптестер! Бүгін біз қазақ халқының лирик, ақиық, мұзбалақ ақыны, мәңгілік поэзияның символы, жүрек жыршысы — Мұқағали Мақатаевтың 95 жылдық мерейтойына арналған «Мұқағали – мәңгілік жыр» атты әдеби кешке жиналып отырмыз. Оның жырлары, әндері әр қазақтың жүрегінен орын алған. Оның өлеңдері махаббатқа, туған жерге, өмірге деген шексіз сүйіспеншілікке толы, шынайылығымен, қарапайым-дылығымен және терең сезімге толы болуымен ерекшеленеді. Мұқағали Мақатаев — қазақ поэзиясының ең көрнекті өкілдерінің бірі. Ол тек ақын ғана емес, сондай-ақ талантты аудармашы болды. Әлем әдебиетінің классиктерін қазақ тіліне аударған. Ең танымал шығармалары: «Үш бақытым», «Аққулар ұйықтағанда», «Сарыжайлау». Бүгінде оның шығармалары халықтың жүрегінен ерекше орын алады және мәңгілік мұра болып саналады. 9 ақпан 1931 жылы Алматы облысы, Нарынқол ауданы, Шалкөде ауылында дүниеге келген. Шын аты — Мұхаммедқали.  27 наурыз 1976 жылы дүниеден өткен.
Әдеби кешімізді «Есіңе мені алғайсың» әнімен бастауға рұқсат етіңіздер. Бұл ән Мұқағали Мақатаевтың нәзік лирикасына негізделген. Онда сағыныш, өткен шаққа деген жылы сезім, адамға деген терең іңкәрлік суреттеледі. Ақын кейіпкері өзін ұмытпай, кейде болса да есіне алып жүруді өтінеді — бұл шығарманың негізгі идеясы.

Ән «Есіңе мені алғайсың».

Жүргізуші: Мұқағали жырларына кезек берейік. Дефектолог Әбубәкірова Аида Ерболқызы «Оюлар».

Отырмын жалғыз түнде мен,

Оқымай, жазбай, мелшиіп.

Кіре алмай ұлып іргеде,

Үнімді тұрды жел сүйіп.

Менімен бірге сұр сағат,

Дем алмапты, тынбапты.

Біздің үйді тұмшалап,

Қап-қараңғы түн жапты.

Отырмын әлі жата алмай,

Отырдым дағы күрсіндім.

Дүниеде бақандай

Бір ақын барын білсін кім?

Жүргізуші: Қазақ тілі педагогі Кемелова Жаңыл Мұқатқызы «Отан».

Мен оның түнін сүйем, күнін сүйем,
Ағынды өзен, асқар тау, гүлін сүйем,
Мен оның қасиетті тілін сүйем,
Мен оның құдіретті үнін сүйем.
Бар жәндігін сүйемін қыбырлаған,
Бәрі маған: «Отан!» деп сыбырлаған.
Жаным менің,
Кеудемді жарып шық та,
Бозторғайы бол оның шырылдаған!
Отан!
Отан!
Бәрінен биік екен.
Мен оны мәңгілікке сүйіп өтем.
Отанды сүймеуің де күйік екен,
Отанды сүйгенің де күйік екен…

Жүргізуші: Құрметті әріптестер, енді шағын шығармашылық сәт. «Менің Мұқағалиым» тақырыбында қысқаша ой бөлісейік. (Педагогтер өз ойларын айтады)

Жүргізуші: Логопед Рашхан Ақерке Ерболсынқызы «Дала, рақмет саған».

Дала, рақмет саған,

Асырдың-ау даңқымды,
Қуанттың-ау халқымды,
Алып төсіңе алып қазан орнатып,
Сапырдың-ау алтынды.
Пай-пай, неткен маңғаз едің,
Білмейтұғын шалқуды.
Жүргізуші: Логопед Успанова Днар Жумакановна «Сап-сары жапырақтар».

Сап-сары жапырақтар…
Сал-сары жапырақтар…
Саудырап құлап жатыр атырапқа.
Біреудің жанарында,
Біреудің табанында,
Сап-сары жапырақтар жоғалуда.
Қаусаған қаңқасы тұр ағаштардың,
Жасыл бақ тоналуда, тоналуда.

Жүргізуші: Дене тәрбиесі нұсқаушысы Қашауов Алмас Нағашыбайұлы «Қазақ жері».

Пай! Пай! Пай! Киелі неткен жер!
Батырлар дүрілдеп өткен жер,
Тұлпарлар дүбірлеп төккен тер,
Ғашықтар бір-бірін өпкен жер,
Сарылып сал-сері кеткен жер.
Бас иіп, иіскеп топырағын,
Тағзым жасамай өтпеңдер!
Мына өлке, мына аймақ, бұл маңда
Құлшылық етемін тұрғанға,
Құлшылық етемін құмдарға,
Тағзым жасаймын қырларға!
Шүкірлік етемін қашан да
Осы бір Отанда тұрғанға!
Жүргізуші:

Ән самал ғой көңіліңді ашатын,

Ән саумал ғой жанның шөлін басатын.

Әсем әннің әуенінде би билеп,

Шіркін-шіркін бұл өмірдің әр сәтін.

Хор «Сен көріктісің, көріктісің».

Жүргізуші: Мұқағали — ғасырлар өтсе де, жыры өлмейтін ақын. Оның өлең-дері — мәңгілік мұра, рухани қазына. Бүгінгі «Мұқағали – мәңгілік жыр» атты әдеби кешіміз аяқталды. Әдеби кешке қатысушыларға үлкен алғыс. Сау болыңыздар!